මූණේ ගෑව පාටට
උස්සල බැඳපු කොණ්ඩෙට
දුවේ... උඹ හොඳටම වෙනස් අද
අනිත් උන් බොන කොට සතුටට
පොඩියක් ගත්ත මං
අද උඹ යන දුකට ;
උඹට මදි පුංචි වෙයි
පැත්තකින් ඉන්නං
නෑවිදින් සබාවට
රජයෙ රස්සාවෙන්
කණමැදිරි අල්ලං ආවට
අලගු තියන්න පුළුවන්ද
ගෙයි පිපෙන හඳ එළියට ;
උඹයි, උඹේ අයියයි
අපෙ පුංචි තරු කැට
අවවාද අනුසාසන
දුවේ තව මොකටද
උඹේ අම්ම උන්නු හැටි
හොඳ හැටියෙ සිහිකොට ;
පිළිකන්නේ මං තිව්ව
කාලේ බෝතල් ටික
මතක නොවැ දුන්නු හැටි
සිංහල බේත් කඩේට
උඹ හොයා ගත් එකා
මට වඩා හොඳ වේවි
උඹත් දැන් ටිකෙන් ටික
ඉවසන්න හුරු වේවි
එත් මයෙ සුදු නෝනෙ
වචන හරහට හිටලා
අත පයක් ඉස්සුනොත්
උඹ ගෙදර ගෙනියන්න
නොවැරදීම මං ඒවි
No comments:
Post a Comment